Så var dagen komen...

Idag er det akkurat 1 år sidan vi fekk møte deg, prinsen vår. Det var 2 dagar før terminen og mamma og pappa hadde gått seg ein lang kveldstur. Då vi kom heim tok vi bilete av den store magen. Vi venta spent på å få sjå kva vi hadde i vente. 5 minutt seinare gjekk vatnet, og vi reiste til sjukehuset.Deretter gjekk det slag i slag, og brått låg du i armane våre. Vi var nybakte foreldre, sprekkferdige av stoltheit. Ein sterk og flott gut vart fødd, og du låg i armane til mamma og pappa og mottok lykkelege og beundrande blikk.
Så liten, og så nydeleg...
Ein stolt pappa fekk halde deg for aller første gong.
Veging og måling var skummelt for ein som nettopp hadde kome til denne nye, store og kalde verda, så ulik det livet du hadde i magen til mamma, med varme og tryggleik.

Litt gulsott gjorde at du låg eitt døgn i lysbehandling. Det var ikkje så kjekt for oss som så gjerne ville halde deg og kose med deg. Men varmen frå lyset gjorde at du sov godt mesteparten av tida.

Ein stolt farfar på sjukehuset. Lite visste vi då om korleis dette året skulle verte....

Flotte guten, du veks så fort.

Smilet er på plass, og det kjem lett. Humoren er det ikkje noko å seie på..

Då det nærma seg sommar vart farfar alvorleg sjuk. Etter nokre tunge veker på sjukehuset, mista vi farfar, og vi stod att med eitt stort tomrom.
Ønske om å drive gard, og at du skulle få vekse opp på gard stod sterkt, og vi bestemte oss for å drive garden etter farfar vidare. Å vekse opp på ein gard er både lærerikt og kjekt.
Hausten var travel, med pappa i arbeid både på Stål og på garden.
Den tøffe hausten gjekk på eit vis, og mykje på grunn av deg, Marius, solstrålen vår. Alltid blid og god. Det er ikkje råd å vere trist med deg i huset. Smilet og latteren er aldri langt unna, og treng mamma og pappa ei litt roleg stund er du koseguten med stor K. Beste i verda!


Utviklinga har gått i ei rasande fart, frå første gongen du rulla rundt, fekk di første tann, og til du tok dine første steg. No er du stor gut. Eitt år, tenk at det har gått så fort. Det har vorte mange bilete og videosnuttar på bloggen her, og det er mange augneblikk vi vil huske på for alltid.
Idag skal vi feire heile dette første året ditt, Marius, og vi skal vere takksame for at vi har fått ein så flott og frisk gut.
Vi er så uendeleg glade i deg, Marius'en vår.
Gratulerer så mykje med 1-årsdagen din idag!
God klem frå mamma og pappa.

Her er vår vesle familie.