Marius har vorte stor gut. Snart 2 år alt...Kvar er vi komne i utviklinga?

"Tida flyg", er noko vi seier støtt og stadig. Og det gjer ho også. Merkeleg nok så er det slik at når ein ser kvarandre kvar dag, så legg ein ikkje så godt merke til dei små endringane som skjer i det daglege. Heldigvis har vi i dag både bilete og film som kan dokumentere tilbake i tid, og det er når eg sit og kikar på bilete at eg oppdagar kor stor Marius plutseleg har vorte. Berre no i jula har det skjedd utruleg mykje, og vi er så takksame for at vi fekk vere så mykje i lag denne jula. Marius har nemleg fått skikkeleg dreis på pratinga, og no tyt han i eitt sett. Det er ikkje alt som er like enkelt å forstå sjølvsagt, men han pratar om mykje vi ikkje ante at han forstår seg på, og går rundt oss her som eit lite "ekko".

Noko eg stadig lurer på når det gjeld denne utviklinga og farta utviklinga går i, er korleis andre born er i denne alderen. Ofte har eg vorte veldig overraska på barseltreff tidlegare når eg ser/høyrer at lydar og fakter er dei same med alle borna, og at alt skjer omtrent på same tid. Dette er utruleg fascinerande! På same tid ser eg no same utviklinga med Mariell, og hugsar igjen etter korleis det var med Marius.

Fekk lyst til å ramse opp nokon av dei tinga som Marius gjer, eller ikkje gjer no når han er 1 år og 10 mnd:

• Han svarar "Marius" når vi spør kva han heiter.
• Han prøver å hoppe, men det liknar mest på tramping. (kan ikkje å hoppe)
• Han et middag, joghurt og skiver sjølv/med skei, og drikk av vanleg glas.
• Han snakkar i korte setningar med 3-4 ord: Til dømes: "Opp og stå", "Ha på dressen"
• Han seier ikkje "r". (sjølvsagt....)
• Han rotar litt med "eg" og "du"...kva er kva?
• Han klarer å kaste ein ball ganske langt, men det er tilfeldig kva hand han brukar. Mest høgre.
• Han kan telje til 3, hoppar ofte over 1, men seier "to, TRE!!"
• Han kan namna på mange i familien, mange i "Drømmehagen", borna i barnehagen, tilsette i bhg, venner, og namna på mange ting og bøker i huset.
• Forstår skilnaden på "på" og "under", "tak" og "golv".
• Seier "takk" og "versågod".
• Har ikkje tissa på potte eller i do enno, sjølv om vi ofte trenar på det.
• Kan kle av/på seg enkelte plagg som lestar og nattdress, støvlar og lue.
• Hjelper til med til dømes å hente ting til mamma, og kaste bleier o.l. i boss.
• Er også veldig hjelpsam med å fyre i ovnen...."Heittttt!" 
• Klarer ikkje å trø sjølv på trehjulssykkelen.
• Kan dukke under vatn, og duppar ansiktet i vatnet sjølv, og seier "Brrrrr".
• Er flink til å "passe seg". Ramlar og slår seg sjelden, men er veldig aktiv og likar godt å klatre.
• Kan ikkje å klatre ut av sprinkelsenga enno. (Takk og lov for det!)
• Legg seg til å sove i eiga seng etter at vi har sagt "god natt".
• Kan putte ulike former i ei kasse ("fisher price"-leike), men har sine favorittar, og tek ikkje med alle...
• Elskar å "ta plassen/stolen" til nokon.
• Hermar.
• Leikar mest "ved siden av" andre born, og ikkje så mykje "ilag med".
• Likar dårleg å dele leikene sine med andre, men det går stort sett bra.

Det vart ei lang liste, og den kunne nok vorte mykje lenger også.

Eg tenkte at den som les dette og tilfeldigvis har/ har hatt born i same alder kanskje kjenner igjen at det var akkurat slik i då. Kanskje er det ting på lista som du ser at dine born akkurat har byrja å gjere...er det ikkje artig? For vår del vert det artig å sjå om Mariell gjer/kan dei same tinga når ho vert like gamal som Marius er no.

Set pris på kommentarar om du har noko å føye til lista, same om det er ditt barn/mitt barn, eller andre born du tenkjer på. Artig å lese alt dei kan sjølv om dei ikkje har vorte 2 år enno.

Gjerne ord og uttrykk, for det er så stilig!!

Her har Marius akkurat "stjelt" stolen til Besten, og sit og "trommar" med fingrane på armlenet slik Besten brukar å gjere. Storkosar seg ekstra når vi seier: "Neeeeei, ikkje ta plassen min!"